ភ្នំពេញ៖ ក្រសួងប្រៃសណីយ៍ និងទូរគមនាគមន៍ សហការជាមួយគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ផ្តល់ជូនសេវាអ៊ីនធឺណិតល្បឿនលឿនសម្រាប់ប្រើប្រាស់ដោយឥតគិតថ្លៃនៅពហុកីឡដ្ឋានជាតិអូឡាំពិក និងពហុកីឡដ្ឋានជាតិមរតកតេជោក្នុងអំឡុងប្រកួតកីឡាស៊ីហ្គេម-ប៉ារ៉ាហ្គេម។

ក្រសួងប្រៃសណីយ៍បានរៀបចំ WiFi សម្រាប់ឱ្យប្រើប្រាស់ដោយឥតគិតថ្លៃនៅចំនួន ១៨៦ទីតាំងក្នុងពហុកីឡដ្ឋានជាតិអូឡាំពិក និងពហុកីឡដ្ឋានជាតិមរតកតេជោ។ ក្នុងនោះមាន សាលក្នុងពហុកីឡាដា្ឋន (Indoor Hall) សាលទស្សនិកជន VIP (VIP Audiences) សាលទស្សនិកជនខាងក្រៅ (Outdoor Audiences) វិមានកីឡដ្ឋាន មណ្ឌលកីឡាហែលទឹក មណ្ឌលកីឡាហុកគី មណ្ឌលកីឡាក្នុងសាល មណ្ឌលកីឡាវាយសី និងវាយកូនឃ្លីលើតុ,មណ្ឌលកីឡាវាយកូនបាល់ សាលហាត់កីឡាប្រយុទ្ធ និងតំបន់សាធារណៈខាងក្រៅពហុកីឡដ្ឋាន។

បើតាមក្រសួងប្រៃសណីយ៍ សាធារណជនអាចស្កេន QR Code នៅផ្ទាំងបង្ហាញនៅតាមទីតាំងជាក់ស្តែង ដែលបានកំណត់ដើម្បីភ្ជាប់ WiFi៕